Vawiin chawhma dar 10:30 khan Lengpui Airport-ah Sports & Youth Services Minister ZH Ropuia chuan NCC Air Wing bunna tur lungphum a phum. He hun hi bialtu MLA Pu Lalthlengliana pawhin Khualzahawm niin a hmanpui.
Pu Zoliana Royte, Director, Sports & Youth Services, inkhawm kaihruaitu chuan Mizorama NCC lo din chhoh dan tlangpui a tarlang hmasa a. Kum 1963 khan Pu Saingenga hovin NCC din a ni a, zawi zawia lo thanglian in tun dinhmunah chuan 20 Ind. Coy NCC leh 1 Mizo Bn te an neih tawh thu sawiin School hrang hrangah NCC Unit 25 leh College-ah Unit 8 a awm thu a sawi. Hun engemaw chen atang khan NCC Air Wing din tura hmalakna lo awm tawh chu lo puitlingin tunah hian hna tan a nih mai tur thu sawiin Plan fund-ah cheng nuai 30 an neih thu a sawi a, Aircraft pawh NCC Director General in rawn pek a beisei thu a tarlang bawk.
Khuallian Pu Ropuia chuan vawiina Mizo thalaite hmakhua ngaihtuaha Sawrkar hmalakna tam tak avanga thalaite leh naupang zawkte vanneih thu sawiin heng ruahmannate hi a taka hmang tangkai thei tura inpuahchah a pawimawh thu a sawi a. Tuna NCC Air Wing din thei tura MZP ten hma an lo laknaah pawh lawmthu sawiin a tha zawnga Sawrkar tha tichaktu an nih thu a tarlang bawk. Minister chuan NCC Air Wing bakah hian Tourism department kaltlanga Aero Sport Scheme kalpui tum a nih thu a sawi a, heng atangte hian thalaite tan Pilot lama kal theihna pawh a inhawng viau dawn a ni a ti. Hotel Management & Catering zirna tur pawh din tum a nih thu leh Vaibelchhe 10 ruahman atangin Vaibelchhe 4 zet chu pawisa hmuh a ni tawh a ti bawk. Heng ruahmanna zawng zawngte hi thalai la naupang zawkte tan a ni tiin a hmang tangkaitu ni turin huaisenna leh tumruhna nen inpuahchah turin thalaite a fuih a ni.
Khualzahawm Pu Lalthlengliana chuan a bial chhunga hetiang hamthatna Sawrkarin a rawn bun avanga a lawmthu sawiin thalaite chuan an vanneihna hmang tangkai thiam se a duh thu a tarlang a. Sawrkar-in thalaite hmakhua a ngaih vanga Youth Commission din tura thutlukna a siam thu te, khawtlang inenkawlna tha zawk Municipal Council din te bakah tunah mai pawh hian state danga thalaiten eizawnna tha tak an hmuh theihna BPO Industry din turin hmalakna a puitlin tep tawh thute sawiin thalaite chu inelna thianghlima kawng hrang hranga intlansiak tura a duh thu a sawi.
Thusawitu dang Pu C.Lalhmachhuana, President, MZP chuan NCC Air Wing nei thei tur hian kum 2003 atang daih tawh khan agenda-a an lo neih ve tawh thute sawiin an theih ang angin harsatna tam tak karah he ruahmanna puitling tur hian hma an lo lak tawh dante a sawi a, vawiina a tak hmel a lo lang ta chu lawmawm a tih thu leh zirlaiten chhawr tangkai thei se a duh thu a sawi bawk.
Technical Report petu Pu Lalruata Sailo, SE, PWD, Project Circle chuan Airport chhunga GAD, Civil Aviation ram pekah thlawhtheihna te (2 seater) Micro-light aircraft dahna tur Hangar sak a nih tur thu sawiin tunlai technology thar steel frame in Pre-Engineer Structure hman a nih thu leh a thawk turin TATA Structura Company te thlan an ni a ti a. Hangar hian hmun 280.50 sq.m, a dung 30.2 mtr, a vang 9.3 mtr a awh tur thu leh technical sanction cheng nuai 25.23 an neih tawh thu sawiin thla 8 chhunga sak zawh an beisei thu a tarlang.
Inkhawm hi Pu T.Sangkunga, Jt Secretary, S & YS in lawmthu sawiin a khar. Vawiin inkhawmah hian mi pawimawh tak takte bakah1 Mizo Bn NCC Cadet thahnem tak leh School leh College hrang hrang atanga NCC Cadet te an tel tha hle a. Govt. Mizo HSS NCC Band ten rimawi tumin hun an hmang bawk.
Airport chhunga Hangar tur bakah hian Office establishment hmun tur tha tak Airport hnai takah hian lei fel tawh a ni.